Хурд хамтлаг

ХУРД ХАМТЛАГИЙН 20 ЖИЛИЙН ОЙГООРОО ФЕНҮҮДДЭЭ БАРЬЖ БУЙ БЭЛЭГ

Монголын рок попын урлагийн амьд домог болсон “Хурд” хамтлагийнхан 1993 оноос өнөөдрийг хүртэл  монголын урлагийн хөгжилд хувь нэмрээ оруулсаар 20 жилийн ойтойгоо золгожээ.

Жил бүр өөрсдийн туурьвисан бүтээлүүдээрээ үзэгч, сонсогч фенүүдтэйгээ уулздаг Хурд хамтлагийн энэ жилийн тоглолт 20 жилийн ой гэдгээрээ онцлогтой бөгөөд тэрхүү хугацаанд бүтээж, туурьвиж.амилуулсан бүтээлүүдээсээ дээжлэн хүргэх аж.

Тоглолт  энэ сарын 29, 30-нд 19:00 цагаас "Улаанбаатар палас"-ын концертын их танхимд болох бөгөөд өнөөдөр тус хамтлагийн залуус хэвлэл мэдээлэлийн ажилтан сэтгүүлчидэд 20-н жилийн ойн хүндэтгэлийн тоглолтын талаар, дэлхийн рок хөгжмийн түүхэнд монголын рок поп урлагийг тунхагласан "Алтан пянз"-аа тухай болон "Хурд" нэрийн брэндүүдээ үзэгч фенүүддээ өргөн барьж буй талаараа дэлгэрэнгүй мэдээллийг хүргэсэн юм.

Хурд хамтлагийн гишүүн Д.Ганбаяр хэлэхдээ “Бид 5 жил,10 жил, 15 жилийн ойн тоглолт гэж хийж байгаагүй. Гитарынхаа утсыг амраалгүй, олон сайхан дуунуудаа ар араас нь гаргаж, тайзан дээрээс үзэгч олонтойгоо байнга уулзсаар 20 жилийг ардаа орхисон байна.Энэ хугацаанд бидэнтэй хамт байсан Монголчууддаа баярлаж явдагаа илэрхийлмээр байна.  Бид 20 жилийн ойдоо зориулан тоглолт хийгээд өнгөрөх биш, фенүүддээ үлдэх, амьдралд нь хамт нэгэн түүхийг бичилцэх “Хурд” нэрийн брэндүүдийг гаргаж байгаа юм.  Энэ  дундаас Монголын түүхэнд анх удаагаа бичигдэх, Холливудын студид хэвлэгдсэн “Алтан пянз”-ыг гаргалаа. Энэхүү пянз маань Монголын хөгжмийн түүхэнд үнэтэй хувь нэмэр оруулах бүтээл юм” гэсэн юм.

Тэд 20 жилийн хугацаанд гаргасан 12 цомгоо нэг “black box” болгон гаргасан нь фенүүдэд нь болон цомгийг нь цуглуулах дуртай хүмүүст үнэхээр том бэлэг болсныг нуух юун. Мөн үүнийгээ дагаад Шинжъян хотод хийлгэсэн гитар, гарын зүүлт, гинж, фудволк,гитарын цохиур, бөмбөрийн цохиур болон ханын хуанлиг фенүүддээ зориулан гаргасан байна.

Хурд хамтлагтай хамт 20 жилийн тэртээгээр аялцгаая

- Урлагийн түүхийг өгүүлэх сайхан зүйлүүдийг бидэнд дурсгах гэж та нартаа юуны өмнө баярлалаа гэж хэлье

-  Бид бүхний амьдралтай цуг байж, бид бүхний уран бүтээлээр амьдарч ирсэн та бүхнийхээ өмнө мэхийн ёслох нь зүйтэй болов уу. Энэ бүх зүйлс бидний 20 жилийн ойдоо зориулан фенүүд та бүхэндээ зориулан гаргаж байгааг дуулгахад таатай байна.

- 20 жилийн ойн энэхүү тоглолт бүх зүйлээрээ түүхэнд үлдэх болно. Энэхүү тоглолтонд дуулагдах дууны тухайд?

- Ойн тоглолт гэдэг утгаараа түүхэнд үлдэнэ л дээ. Бас энэ чинь нэг хэвийн концерт биш л дээ. “Хурд ампплагед”, “Симфони Хурд” гэх мэт тоглолтон дээр гэхэд нэг цомогт орсон дуунуудаар тоглолтоо хийдэг байсан бол энэ тоглолт бол 12 цомгийн 160,170 дуунуудаас түүвэрлэсэн 33 дуутай концертыг тавих гэж байна. Энэхүү тоглолтонд дуулагдах дуунуудыг сонсоод хамтдаа нэг үдшийг өнгөрүүлэх бүх фенүүдийгээ урьж байна.

- Фенүүддээ бэлдсэн энэхүү алтан пянзныхаа тухайд яривал?

- энэхүү алтан пянзыг хэр баргийн хамтлаг дуучид гаргадаггүй юм байна. Хурд гэж ямар хамтлаг байна, хэдэн жил болж байна, хэдэн тоглолт хийсэн гээд олон шалгуурыг давж гарч ирсэн пянз байгаа юм. Ард түмэнтэйгээ хамт байж алтан пянзыг гаргаж байгаадаа баяртай байна. “Эрика” хэмээх студид хэвлэгдсэн. Энэ студийн хананд олон алдартай дуучдын алтан пянзнууд сувинер маягаар хадгалагдаж үлддэг юм байна лээ. Энэ дунд бас Азиас Монголоос манай хамтлагийн алтан пянз анхных болж хадгалагдаж үлдэж байгаад баяртай байна. Бидний энэхүү алтан пянзныг хэвлүүлэхийн яг өмнөхөн дуучин Леди гага пянзаа хэвлүүлсэн байсныг сонирхуулан хэлэхэд таатай байна.

- Энэхүү   “Хурд” нэрийн брэндүүдээ хаана хаана худалдаалж, фенүүдийнхээ гарт хүргэх вэ?

- 20 жилийн ойн брэнд гэдэг утгаараа цөөхөн хувиар хэвлэгдэж ирсэн. 11 нэр төрлийн “Хурд” нэрийн брэндүүдээ бид тоглолтын өдрөө худалдаалах болно. Тиймээс тоглолтын цагаас өмнөхөн ирээд энэхүү сувинерүүдээр аялаад зүүлт юмуу фудволк худалдан аваад өмсөж, зүүгээд тоглолт үзвэл тэр бас тоглолтыг үзэх соёл, урлагийг үнэлэх үнэлэмж гэж бодож байна.

- Баярлалаа. Тоглолтон дээр уулзацгаая